دكتور وليد الفطيسي يقدم روشته مجانيه ومعلومات مهمه عن فيروس كورونا

كتب هاني الصافي انتشارلفيروس أصبح حتمى فى معظم الدول لا علاقه له بإمكانيات الدولة مثلا الولايات المتحدة وإيطاليا خارج السيطرة بريطانيا واسبانيا كل يوم معدلات الإصابة بتزيد بشكل مرعب
طب ده يعنى ايه. يعنى بطل فزلكه بقى انت وهو وافهم وبلاش استظراف أو ادعاء المفهوميه وركز مع الناس اللى خايفه عليك وعايزاك تعدى الصعب بلاش بقى تاخد النصيحة غير من متخصص أسمع كلام طبيبك اسمع كلام فرق النوعيه ومنشورات النوعيه بلاش تاخد معلوماتك من اى حد ع الفيسبوك او الناس اللى قعده تفتى ٢٤ ساعه ف التلفزيونات

طيب بص بقى يا سيدى
اولا : قعدتك فى بيتك معزز مكرم حتحميك فعلا وحتقلل فرص إصابتك قبل تحركاتك وشغلك عيش على قدك اليومين دول و فهم ولادك واسرتك أن احنا ف ظروف استثنائية وحنعيش على قدنا الفترة دى عشان صحتك اهم من اى حاجه دلوقت كل أكل بسيط وصحى ف نفس الوقت ويكون غنى بفيتامين c واى مصدر بروتين حيوانى أو نباتى واحنا كمصريين ملوك الاكل ده
ثانيا : لو جالك برد متقلقش وتخبل الدنيا حواليك وبرده اقعد فى بيتك خد خوافض حرارة وكل كويس ونام كويس وحاول تقلل اختلاطك باللى ف البيت البس ماسك أو امسك منديل متكحش فى وشهم النضافه الايام دى تساوى رزق الدنيا وياسيدى اغسل ايدك كل شويه ومتفكرش تطلع المستشفى ف ايام حظر زى دى وتخبل الشرطه اللى ف الشارع واهلك وتزحم الطوارئ ف المستشفى و تخبل الدكاترة ويقولو عليك عبيط جاى تاخد العدوى بنفسك ماترحش المستشفى غير لو حسيت ب
١- درجة الحرارة أعلى من 38 ونص ومش بتستجيب للخوافض
٢- صعوبة ف التنفس شديده ومستريحتش مع العلاج العادى ٣- اسهال وقىء مستمر
٤- تكسير شديد وإرهاق شديد لدرجة انك مش قادر تتحرك من مكانك
لو حاجتين من الأربع حاجات دول ممكن تروح لاقرب مكان فيه دكتور او مستشفى عشان تطمئن ومش معنى كده برده أن حيبقى عندك كرونا ولما تروح المستشفى بلاش تاخد عيلتك كلها وبلاش تدور ع الزحمه اهدى وابعد عن الزحمه والبس الماسك بتاعك وخلص كشفك وروح علطول انت مش ف فسحه
ثالثا واخيرا بالله الفيروس مش بيفرق بين غنى وفقير احساسنا ببعض وعدم الانانيه و التفافنا حول قياداتنا نسمع كلامهم ونبطل هزار ونشجع بعض ونرفع معنويات الطاقم الطبي اللى هو على خط المواجهه ونحسسهم أن مجهودهم مش حيروح ع الأرض وأن مفيش فايده وان الجهل حيضيع الكل الكلام الحلو والتشجيع ف الوقت الصعب ده والسلوك المتحضر من الجميع حيخلينا نكمل لآخر نفس فينا لأننا فداكم وفدى حبايبنا كلهم بس ارجوكم تفهموا الكلام ده كويس. وان شاء الله مصر محروسة من عند ربنا ومعدن شعبنا مش بيظهر كويس غير ف الأوقات الصعبة دى.
دمتم بألف خير وصحة. دكتور وليد سيف الفطيسي اخصائى امراض معدية